ਕੁੱਖ ਵਿਚਲੀ ਧੀ ਲਈ:

 ਤੂੰ ਆ ਹਰਿੱਕ ਵਿਹੜੇ ਵਿੱਚ

             ਪੁੰਨਿਆ ਦੀ ਰਾਤ ਬਣ ਕੇ

 ਆਵਣਗੇ ਇਕ ਦਿਨ ਤਾਰੇ

                  ਤੇਰੀ ਬਰਾਤ ਬਣ ਕੇ

  ਤੂੰ  ਖਿੜ ਹਰਿੱਕ ਵਿਹੜੇ  ਵਿੱਚ

            ਸੱਜਰਾ  ਗੁਲਾਬ ਬਣ ਕੇ

ਅੰਮੜੀ ਦੇ ਹਉਕਿਆਂ ਲਈ

             ਹੱਸਦਾ ਜਵਾਬ ਬਣ ਕੇ

ਆ ਵੀਰ ਦੇ ਸਿਹਰੇ ਲਈ

            ਕਿਰਨਾਂ ਦੀ ਤੰਦ ਬਣ ਕੇ

ਆ ਭੈਣ ਲਈ ਸ਼ਗਨਾਂ ਦਾ

           ਕੋਈ ਬਾਜ਼ੂਬੰਦ ਬਣ ਕੇ

ਉੱਡ ਬਾਗ ਵਿੱਚ ਬਾਬਲ ਦੇ

       ਸੱਧਰਾਂ ਦੀ ਤਿਤਲੀ ਬਣਕੇ

 ਜ਼ੁਲਮਾਂ ਦੇ ਬੱਦਲਾਂ'ਚੋਂ

       ਲੰਘ ਜਾਈਂ ਬਿਜਲੀ ਬਣ ਕੇ

ਤੂੰ ਰਾਜ-ਭਾਗ ਮਾਣੇ

          ਖਲਕਤ ਸਵਾਲੀ ਹੋਵੇ

ਹਰ ਘਰ'ਚ ਤੇਰੇ ਵਰਗੀ

      ਕੋਈ ਕਰਮਾਂ ਵਾਲੀ ਹੋਵੇ।

ਜ਼ਿੰਦਗੀ ਦੇ ਸਫਰ ਅੰਦਰ

           ਔਖੀ ਘੜੀ  ਨਾ ਆਵੇ

ਰੱਬ ਤੇਰੀ ਝੋਲੀ  ਦੇ ਵਿੱਚ

           ਖ਼ੁਸ਼ੀਆਂ ਹਜ਼ਾਰਾਂ ਪਾਵੇ